जर्मनीमा एक दिनमा अहिलेसम्मकै धेरै कोरोना सङ्क्रमित

बर्लिन । जर्मनीमा अहिले दिन प्रतिदिन कोभिड १९ का सङ्क्रमितहरु बढ्दै गएको पाइएको छ । यहाँका स्वास्थ्य अधिकारीहरुले सो कुराको जानकारी दिएका छन् ।

ती अधिकारीहरुका अनुसार बुधबार मात्र यहाँ त्यस अघिको २४ घण्टामा ८० हजार ४३० जना सङ्क्रमित भेटिएका छन् ।

यो सङ्ख्या यहाँ कोरोना भाइरसको सङ्क्रमण सुरु भएदेखिकै एकै दिनमा देखिएको यो सबैभन्दा धेरै सङ्ख्या हो । यहाँका अधिकारीहरुले जर्मनीमा ठुलो सङ्ख्याका नागरिकले खोप लगाइसकेको बताएका छन् । उनीहरुका अनुसार यहाँ ७२ प्रतिशतभन्दा बढी नागरिकले दुवै मात्रा खोप लगाएका छन् ।

त्यस्तै यहाँका करिब तीन करोड ७० लाख नागरिकले खोपको बुस्टर डोज पनि लगाएका छन् । तर पनि पछिल्लो समयमा यहाँका ठुलो सङ्ख्याका नागरिकमा सङ्क्रमण बढ्दै गएको पाइएको छ ।

उता युरोपका धेरै देशमा पछिल्लो समयमा कोरोनाको सङ्क्रमण बढ्दै गएको विश्व स्वास्थ्य सङ्गठन (डब्लूएचओ) ले जनाएको छ । सो सङ्गठनले आगामी आठ साताभित्र युरोपको आधाभन्दा बढी जनसङ्ख्यामा कोभिड सङ्क्रमित हुने चेतावनी दिएको छ ।

कोभिडको नयाँ भेरियन्ट ओमिक्रोन फैलिएसँगै युरोपका विभिन्न देशमा सङ्क्रमण दर ह्वात्तै बढिरहेका बेला डब्लूएचओको चेतावनी आएको हो । पश्चिमबाट पूर्व फैलिएको ओमिक्रोनको लहरले सम्पूर्ण युरोप नराम्रोसँग प्रभावित भएको डब्लूएचओका हान्स क्लुगीले बताए । रासस