पुस २७ काठमाडौं । कोभिड-१९ सङ्क्रमणको जोखिम रहेको भन्दै आजबाट विद्यालय बन्द भएका छन्। शिक्षा विज्ञान तथा प्रविधि मन्त्रालयले संक्रमण तीव्ररूपमा फैलिएकाले विद्यार्थीको स्वास्थ्य, सुरक्षा तथा बचावटको विषयलाई विशेष ध्यान दिँदै देशका सबै आधारभुत तथा माध्यमिक विद्यालय मंगलबारबाट माघ १५ गतेसम्म विद्यालय बन्द गर्ने निर्णय गरेको हो।
मन्त्रालयले विदाको अवधिमा विद्यालयहरूले सिकाई सहजीकरण निर्देशिका २०७७ ले गरेको व्यवस्था बमोजिम विद्यार्थीको सिकाइमा आवश्यक सहजीकरण गर्ने प्रबन्ध मिलाउन निर्देशन दिएको छ।
मन्त्रालयले जारी गरेको विज्ञप्तिमा वार्षिक बिदामा मिलान हुने गरी दिएको विदाको अवधिमा १२ वर्षदेखि १७ वर्ष उमेर समूहका विद्यार्थीहरूलाई सबै स्थानीय तहमा रहेको स्वास्थ्य चौकीमार्फत् कोरोना भाइरस विरुद्धको खोप लगाउने कार्यक्रम रहेकोले विद्यालयसँग सम्पर्क गरी तोकिएको दिनमा खोपलगाउने कार्यमा आफ्ना बालबालिकाहरूलाई पठाइदिनुहुन सबै अभिभावकहरूमा अनुरोध गरिएको छ ।
मन्त्रालयले विश्वविद्यालय र शैक्षिक प्रतिष्ठानहरूले पूर्व निर्धारित सेमेष्टर र वार्षिक परीक्षाका कार्यक्रमहरू जनस्वास्थ्य र सुरक्षाका मापदण्डहरू पूर्ण रूपमा पालना हुनेगरी सञ्चालन गर्न आग्रह गरेको छ।
आइतबार मात्र कोभिड १९ सङ्क्रमण व्यवस्थापन समन्वय समिति (सीसीएमसीसी) ले विद्यालयहरु माघ १५ गतेसम्म बन्द गर्न शिक्षा मन्त्रालयलाई सिफारिस गरेको थियो।
अन्नपुर्ण पोस्टबाट
